Il “cjantôr contestoriis” a Aquilee

Il “cjantôr contestoriis” di Italie, Angelo Branduardi, al sarà ospit de citât di Aquilee ai 17 e 18 di Lui prossims. Un dopli apontament, organizât dal Comun di Aquilee, che al à vût ancje la poie de ARLeF – Agjenzie regjonâl pe lenghe furlane. Il cjantautôr e polistrumentist al è cognossût di fat ancje pe sô reinterpretazion famose de balade popolâr “Scjaraçule Maraçule”, atribuide a Giorgio Mainerio: musicist e predi, une figure emblematiche de complessitât scure e visionarie dal ’500 furlan, là che cult e popolâr si fondin intun misteri che no simpri si pues scandaiâ. Branduardi al sarà protagonist, lunis ai 17 di Lui, aes 8 di sere, inte sale consiliâr dal Comun di Aquilee. Li al presentarà il so libri “Confessioni di un malandrino”, dialogant cul gjornalist dal Messaggero Veneto, responsabil des pagjinis di culture e spetacul, Oscar D’Agostino. La sere dopo, martars ai 18 di Lui, il cjantautôr si esibirà intun conciert, simpri a Aquilee, in place dal Cjapitul, des 9.30 di sere. Ducj i doi i events a saran a jentrade libare. (A.I.) – 14.07.2023