Il cjamp di lavôr deventât cjase di operaris

Te ex scuele elementâr dal “Villaggio Roma” (Vile Rome) a Tor di Zuin, domenie ai 21 aes 5 di dopomisdì al sarà presentât il spetacul teatrâl “Fuga dal campo 107”, Fuide dal cjamp 107, un progjet de Pro Torviscosa aps, cu la senegjature e la regje di Dario Ponissi e Romana Maiori dal “Teatro del leone” e un grup di zovins atôrs. Il spetacul al conte la storie dai presonîrs scjampâts daspò dai 8 di Setembar 1943 dal “cjamp 107” di Tor di Zuin: un dai cjamps di lavôr tirâts sù in Italie vie pe seconde vuere. In chest câs, al tacà a funzionâ tal 1942, internant in dut un miâr di soldâts britanics, neozelandês e sudafricans. Daspò de fin de vuere, la vile e deventà la cjase pai operaris agricui de SNIA Viscosa, cjapant il non di “Villaggio Roma”. (A.I.) – 20.09.2025