Il “Bon” al siere cuntune novitât di Glauco Venier

L’ultin event de stagjon musicâl de Fondazion “Luigi Bon” di Culugne al è in program par vinars ai 10 tal teatri “Paolo Maurensig” di Felet. “Giacomo and Duke” al è il gnûf progjet dal pianist furlan Glauco Venier, che al olse di meti dongje lis composizions di dôs figuris impuartantis de musiche classiche e jazz: Giacomo Puccini e Duke Ellington. Dôs iconis de musiche dal vincjesim secul, che a somein lontanis une di chê altre, ma a son invezit une vore dongje dal pont di viste artistic in graciis des lôr tantis afinitâts. Chestis someancis e leams a son la fonde dal progjet artistic di Glauco Venier, che al sunarà in tercet cun Daniela Spalletta ae vôs e Alfonso Deidda al flaut. (A.I.) – 09.04.2026