I langobarts furlans fint in Sicilie

Il cine “Langobardi – Grimoaldo” (Langobarts – Grimalt, il prin re furlan), prodot de associazion Invicti Lupi di Romans dal Lusinç e cu la regjie di Sandra Lopez Cabrera, al rive fint in Sicilie, daspò di jessi stât sielzût in maniere uficiâl pe diesim cuinte edizion dal “Festival da comunicazion archeologjiche e dal cine”, programât dai 2 ai 7 di Dicembar. Chest festival internazionâl dal cine si dediche a difondi la storie antighe midiant des arts visuâls, par fâ deventâ dissipline de archeologjie “publiche”, ven a stâi aumentant la cussience de societât civîl pai temis principâi de archeologjie, de storie e de art. Il documentari, prodot di Matteo Grudina, al sarà proietât miercus ai 3 a Catania, a buinore, par sburtâ la partecipazion dai students e des scuelis. Il documentari al à vinçût fin cumò 54 premis internazionâi (16 prins puescj, 9 menzons speciâls e 29 selezions uficiâls): chescj ricognossiments a mostrin la sô capacitât di sensibilizâ e promovi la storie de regjon tant che tiere di confin in dut il mont e di meti in lûs i events che a son sucedûts in Friûl tal setim secul, ai timps dai Langobarts. (A.I.) – 01.12.2025