I langobarts di Romans dal Lusinç a Belgrât

Il cine documentari “Langobardi – Grimoaldo, il primo re friulano (Langobarts- Grimalt, il prin re furlan”, prodot de associazion culturâl Invicti Lupi di Romans dal Lusinç, al è stât sielt dal Istitût Culturâl Talian di Belgrât pal vincjesim sest Festival dal Cine Archeologjic di Belgrât (Serbie), inmaneât cu la colaborazion dal Museu Nazionâl culturâl di Belgrât e di altris istituzions ativis te capitâl serbe. La rassegne e ufrîs ai esperts dal cjamp e a un public di apassionâts la pussibilitât di esplorâ lis produzions plui resints tal cjamp de archeologjie. “Grimalt…” al è stât un dai trê cines proponûts de Italie, il paîs ospit di chest an, presentât inte version origjinâl cun sotitui in serp de bande dal Istitût Culturâl Talian di Belgrât. (A.I.) – 25.05.2025