I fruts di Sacîl e di Tarvis a àn imparât a riparâ un piano

La musiche e met dongje, e bute jù i mûrs dal prejudizi e e integre lis diferencis. I valôrs des notis a son bogns di passâ i struments par deventâ materiâi educatîfs che a lavorin su lis emozions, disvilupant potenzialitâts espressivis e creativis di fruts e frutis. Lu dimostre il sucès de tierce edizion di “Pianorotto”, une iniziative nassude ai timps dal Covid intal 2021 di une idee di Ermanno Basso e promovude di SimulArte e dal Ert Fvg inte suaze des ativitâts di Teatroescuola. Chest an al à cjapât dentri i students de primarie di Sacîl e di Tarvis par “riparâ” e rimeti a pont un piano, intun cul mestri riparadôr Luca Bonutti, che al è stât duncje donât ae scuele. Lunis ai 5 e martars ai 6, il pianist Claudio Filippini al è ospit des dôs scuelis par sunâ su chel piano. (A.I.) – 05.06.2023