I fotografs sul schermi dal cine

La otave edizion di “Obiettivo cinema – Fotografs sul schermi grant” e tache vinars ai 17 tal Cine “Splendor” di San Denêl. L’event al è promovût dal circul fotografic “Battigelli” in colaborazion cun Officine d’Autore, la associazion che e inmanee la stagjon dal cine Splendor. Cheste serie di cuatri events e darà al public la pussibilitât di cjatâ autôrs, imagjins e storiis leadis al mont de fotografie, intun viaç che al cjape dentri ritrats, servizis gjornalistics, nature e events. La iniziative e nas dal desideri di podê amirâ lis fotos sul schermi grant e di comentâlis e analizâlis, sedi di une prospetive tecniche sedi artistiche. Il prin event al darà acet a Giorgio Galimberti, che al vuidarà il public intun viaç traviers lis tapis principâls de sô ricercje fotografiche, cjapant dentri ritrats e atmosferis urbanis. (A.I.) – 16.04.2026