Martars ai 2 di Avrîl aes 6 dopomisdì, tal Teatri “Pasolini” di Çarvignan, par celebrâ il centenari dal pitôr Giuseppe Zigaina intal dì de sô nassite, al sarà proietât pe prime volte “Zigaina. La mia idea del dipingere” (Zigaina. La mê idee dal piturâ), un documentari realizât dal regjist e gjornalist Francesco Bortolini: une lungje interviste mai viodude prime, là che l’artist al conte la sô infanzie, la sô famee, la decision di restâ in Friûl, il so percors di artist, i varis periodis de sô piture, il rapuart cul neorealisim e cui inteletuâi de sô epoche, la amicizie cun Pasolini e altri ancjemò. Dopo la muart di Bortolini intal 2016, il filmât – che nol jere stât finît – al è stât consegnât dai siei familiârs al amì Piero Colussi di Cinemazero e al è stât ultimât di Fulvio Toffoli. (A.I.) – 29.03.2024
Foto di M. Paviotti
