Gnots di mieç Istât a Lignan

Un percors di emozions di amôr pandudis doprant la musiche e lis peraulis in spetacui di teatri, concierts, presentazions leteraris e riflessions, in dôs glesiis di Lignan: che di S. Zaccaria e che di Sante Marie dal Mâr. La cuinte edizion des “Gnots di mieç Istât”, la rassegne culturâl promovude dal Comun di Lignan e curade de orchestre dai zovins Filarmonici Friulani cu la colaborazion di Mario Brandolin, e je formade di sîs seradis dai 15 di Lui ai 19 di Avost, dutis leadis al teme dal amôr. Si tache cuntun viaç dentri des letaris di amôr plui penzis de storie, letis di Martina Delpiccolo e Fabiano Fantini, po dopo la presentazion dal romanç “Le verità pericolose” di Daniela Galeazzi, un monolic lizêr e ironic di Massimo Somaglino, un altri di Paolo Nori il tango sunât di Daniele di Bonaventura cui Filarmonici Friulani, che pal ultin apontament a presentin “Brass_Love”, un conciert di musichis gjavadis di cines romantics fatis dome dai otons de orchestre. (A.I.) – 14.07.2025