Friuli Doc, une ploie di concierts

La trentesime edizion di Friuli Doc e varà plui musiche di simpri. Il palc tradizionâl di Place Libertât e ospitarà i avigniments principâi, ma la aministrazion comunâl e à preparât une schirie di palcs “piçui” cuntune programazion dute a jentrade sore nuie, fate in colaborazion cu la Groove Factory, che e puartarà la musiche in ogni cjanton dal centri storic. In dut, plui di 250 tra cjantants, musiciscj, Dj e balarins, cun tancj nons di “palc grant” tant che Shari, Doro Gjat…, par un totâl di 65 apontaments intai palcs sul plaçâl dal Cjistiel, in place Venerio, in Larc Ospedâl Vecjo e in place XX Setembar. I artiscj a sunaran ogni dì, fint a miezegnot. In place Libertât invezit, se nol plûf, si scomence cun Johnson Righeira acompagnât de orchestre Sinfonico Honolulu, in zîr pai cuarante agns di “Vamos a la playa”. Vinars ai 13 il pop-punk dai Finley, sabide ai 14 musiche e ridadis cun Valerio Lundini e I Vazzanikki e domenie ai 15 la stele Alex Britti. (A.I.) – 11.09.2024