Friuli Doc: no dome mangjâ e bevi, ma ancje musiche dal vîf

Trê grancj concierts a jentrade cence sore nuie in place Libertât a son dome che une part dal program musicâl di “Friuli Doc 2025, la rassegne che par cuatri dîs e animarà la citât di Udin. Il prin apontament al è vinars ai 12 cun Giuliano Palma, un dai artiscj plui ecletics de musiche taliane, il dì dopo une personalitât jessude tai ultins agns, Joan Thiele, e pal gran finâl di domenie ai 14 ve chi Gaia, un dai grancj talents de musiche taliane jessude di un “talent show”, X Factor, e po dopo protagoniste ancje a Sanremo. Il program di musiche dal vîf al è dut câs une vore plui grant e al cjape dentri passe trente apontaments in Zardin grant, in place XX Setembar, sul plaçâl dal Cjistiel e in altris lûcs.: concierts e Dj, tant che i sîs udinês che a àn cjapât il non di Cucina Internazionale e che a tacaran a fâ balâ joibe ai 11. Tai dîs che a vegnin, la zovine stele milanese de musiche eletroniche Eva Bloo, Be Nice, Boosta, ma ancje cetant altri: il rapper di chenti Doro Gjat, il spetacul omaç “Abba Show”, Cindy and the Rock History e une schirie di concierts itinerants. (A.I.) – 09.09.2025