Folkest si pronte par passe un mês di concierts

La cuarantesime otave edizion di Folkest, la rassegne musicâl “curiose dal teritori”, e torne ae memorie dal taramot, stant che propit un pâr di agns dopo de disgracie, dentri de esperience des radio privadis – massime une: “Radio Rinascita Friuli Centrale “ di S. Denêl – al nassè il progjet de “Fieste di chenti”, il prin moment di rinassite culturâl. Cambiât il non in “Folkest”, al è deventât il festival talian di “world music”, musichis dal mont, che al va indevant di plui timp, simpri cu la vuide dal diretôr artistic Andrea Del Favero. La scuvierte des lidrîs propit dal incuintri cun chês dai altris, ancje dal forest, e je simpri stade la anime dal festival, che al va indevant cun ospits talians e internazionâi ancje in cheste edizion, dai 11 di Jugn e fint ai 21 di Lui. Scarlet Rivera, New Trolls, Peppe Voltarelli, Omar Pedrini, Perturbazione, Nomadi, Vincenzo Zitello, Angelo Branduardi, Gianluca Gotto a son dome i nons plui cognossûts di un program che al tache propit a Glemone, al va a torzeon pal teritori par passe un mês, ancje dopo des zornadis centrâls (dai 3 ai 5 di Lui) a S. Denêl, di cualchi an la gnove cjase dal festival. Dentri de rassegne, ancje il premi “Alberto Cesa”, cun 5 finaliscj sielts su 150 in dute Italie, seminaris e conferencis, il progjet european Upbeat pai artiscj zovins e cualchi visite vuidade ae scuvierte dal teritori. (A.I.) – 24.05.2026