Sîs agns di spiete, cuasi cincuante cjançons rivadis ae segretarie dal festival, e cumò cuindis cjançons a son prontis par tornâ a puartâ la cjançon marilenghe in voghe. Joibe ai 10 aes 9 sot sere, il Festival de cjançon furlane al torne sul palc di sene dal Teatri Palamostre di Udin denant dal grant public de trentesime seste edizion dal “Friuli Doc”. Chest al è il spetacul sielzût par tornâ a presentâ un event che al à dât forme ae storie de musiche regjonâl e, daspò di une polse di sîs agns, al torne a cjatâ il so public. Cuindis cjançons, selezionadis de jurie dal Festival vuidade dal produtôr Enrico Brun e interpretadis in direte cul acompagnament de orchestre direte dal mestri Rudy Fantin, diretôr artistic de manifestazion adun cun Marco Bianchi, a saran in gare. La serade e met dongje musiche, lenghe e identitât e e cjate tal palc dal Friuli Doc une vetrine une vore impuartante.
I tocs in gare a son: “Brennero – Dismenteâ il me non” di Gianluca Versolatto; “Cence di te” di Federica Copetti; “Cjatâsi pierdût” di Alvise Nodale e Cinque uomini sulla cassa del morto; “Dîs minûts” dai AccorDòs; “Jenfri me e me” di Margherita Zuccato; “La balade dal pensionât” di Franco Ferruglio; “Lassimi l’amôr” di Eliana Cargnelutti; “Lassimi sumiâ” di Franco Giordani; “Mari mê” di Monica Commisso; “Nine nane” di Michela Franceschina; “Salvadie “di Eva Tomat; “Sot da ploe” di Raffaello Indri; “Stagjons” di Emil Lenisa; “Stele” di Anna Viola e “Strie” di Marta Savorgnan. (A.I.) – 09.09.2026
Foto di Fotoimpronte