Elsa Morante: dal romanç al teatri

Il cartelon di prose dal Teatri gnûf “Giovanni da Udine” al va indevant cun “La Storia”, ven a stâi “un scandul che al dure di dîs mil agns”, un spetacul ispirât in mût libar de innomenade opare mestre di Elsa Morante e ambientât a Rome vie pe seconde Vuere mondiâl. Diret di Fausto Cabra, al sarà in sene joibe ai 9 cuntun program dopli: aes 11 di buinore pes scuelis e aes 8 e mieze sot sere par ducj. Dentri dal program di prose progjetât dal diretôr artistic Roberto Valerio e produsût cul supuart de Fondazione Friuli, “La Storia” al evidenzie la vitalitât straordenarie dal romanç di Elsa Morante, cirint di tradusi tal lengaç dal teatri ce che al sucêt cuant che si fâs il confront cu la leterature. (A.I.) – 08.04.2026