E je partide la “farie” des vôs di Percût

Al è jessût di cualchi dì in rêt (su: www.percotocanta.it) il bant pe “piçule Sanremo dal Friûl”, il concors “Percoto Canta”, un riferiment pe sene musicâl no dome di chenti, ma taliane, che si davuelç di 39 agns e al à aromai une storie clare di une “farie” di talents zovins de vôs. Lis primis selezions si fasaran ai 30 e ai 31 di Mai te Cjase de Musiche di Çarvignan, cu la pussibilitât di partecipâ ancje ‘di lontan’, cul jutori de tecnologjie. Une maniere par tirâ dongje un public simpri plui larc, une des manifestazions musicâls che e va indevant di plui agns, ricognossude a nivel nazionâl. Lis semifinâls a son in program pe seconde metât dal mês di Lui a Grau, cuntune serade vierte al public, po dopo il concors si sierarà a Gurize, tal teatri “Verdi”, cu la esibizion dai 12 cjantants selezionâts, che a presentaran ognidun o ognidune dôs cjançons compagnâts di une orchestre. Come simpri, la jurie di cualitât e sarà di nivel alt – vire pai agns a son stâts Rossana Casale, Omar Pedrini, Petra Magoni, Francesco Tricarico, Dodi Battaglia, Grazia Di Michele e di cetancj altris. Il premi ideât de associazion di Percût al à garantît une buine cariere a cetancj di lôr, che daspò d vê tacât achì, a àn vinçût altris manifestazions nazionâls, ancje plui innomenadis. (A.I.) – 21.04.2026