Dutis lis novitâts di radio Onde Furlane

Cu la fin dal Istât, Radio Onde Furlane si prepare pal cambi di stagjon e cussì e torne ae programazion “classiche”. Di lunis ai 22 di Setembar, la prime edizion dal “Gjornâl Radio”, che daûr di chel al rive dal “Meteo”, e tornarà aes 8 di buinore. Ancje la rassegne stampe cuotidiane, “In dì di vuê”, compagn dal GR, di lunis a sabide, e recuperarà la sô colocazion “tradizionâl” des 9 aes 9 e mieze. A chê ore, di lunis a vinars, al tacarà il contignidôr di aprofondiment culturâl “Ator Ator”, intant che la sabide, des 9 e mieze aes 1,1 al tornarà il “Dret & Ledrôs”, cul so specific tai plui leât ae croniche, ae politiche e ae societât. In cheste suaze, ogni vinars a 9 e mieze, al sarà ancje il spazi di presentazion de “Vôs dal Furlans”, che vie pal Istât al jere a 10.
La direte de buinore, però, di lunis a sabide si scree za aes 7 e mieze cu la gnove trasmission di Nicholas Dolso, “Une vôs in miezore”: in ogni pontade si scoltarà alc di specific dal repertori di une vôs (chê di un artist solist o di une band) che e à fat la storie de musiche. Un altri gnûf apontament. Cun di plui in code dai Gjornâi Radio, aes 8 e un cuart a buinore, aes 3 mancul un cuart dopo di misdì e aes sîs e un cuart sore sere), di lunis a sabide, simpri tacant dai 22 di Setembar, si cjatarà une altre gnove trasmission cuotidiane. Il so titul al è “Ogni dì alc ce dî” e al è un apontament là che si pescjarà fûr dal gnûf Dizionari de lenghe furlane (HYPERLINK “http://dizionarifurlan.eu/”dizionarifurlan.eu) une peraule cun cualchi particolaritât o curiositât che e vignarà contade di Sandri Carrozzo. Tant a dî: ogni mês si fâs la lune e ogni dì si impare une!
Par ce che e tocje i programs musicâi, si invie la gnove serie dedicade aes produzions fatis in Friûl, “Spin”, par cure di Andrea Ioime, in prime emission la sabide a undis a matine, a tornin i direte Agnul Tomasin e Francis, in prime emission un daûr di chel altri il lunis tal dopomisdì tacant des 4 cun “Gerovynil 55-80” e cun “Indigo”, e “Tommy. The Radio Magazine”, in direte il martars aes 15. E je confermade ad in plen la programazion serâl, tacant di “Mainzai” il miercus cun Piotre a “Symphony of Silence”, la sabide cun Hadrianus. E torne ancje la rie di trasmission tematichis in prime emission di undis ae buinore, tacaant dai apontaments cuindisinâls su lenghis, dirits, minorancis e nazions cence stâts, in onde il martars a 11, il miercus a une dopo misdì e la sabide aes 1.30 dal dopomisdì, cun “Internazionalitari”, par cure di Carli Pup (“Internazionalitari”) e Marco Stolfo (“Babêl Europe”). Si pues scoltâ Onde Furlane in modulazion di frecuence sui 90 Mhz, in cuasi dut il Friûl, sui 90.2 Mhz, inte plui part de Cjargne e sui 105.6 Mhz inte zone di Denemonç, e po ancje in streaming in cualsisedi bande dal mont là che e je une conession internet e q sedin un pc, un tablet e o un telefon che a permetin la navigazion intal web. (R.L.V.) – 21.09.2025