Dut plen par Mario Biondi te Basiliche di Aquilee

Di 1700 agns e je un lûc pal scambiâ ideis e cjatâ culturis. La Basiliche di Aquilee, simbul de cristianitât e des lidrîs dal Friûl, e torne a dâ acet ae rassegne di concierts vie pal Istat inmaneade de Societât pe conservazion de basiliche. Il prin apontament al è stât vendût fûr par fûr intun pâr di oris daspò de presentazion uficiâl: Mario Biondi – pe prime volte te Basiliche, ricognossude dal Unesco dal 1998 – cu la corâl Natissa e la orchestre dai zovins Filarmonici Friulani, che pe prime volte e proponaran il “Credo Aquileiense”, une composizion comissionade a Alessio Domini. Chel di vinars ai 12 di Jugn al sarà dome il prin di dîs apontaments, ducj a jentrade libare, ancje te Basiliche di Grau e la Catedrâl di Gnove Gurize. “Une oportunitât straordenarie – al sclarìs Andrea Bellavite, il diretôr de Fondazion – par vivi un lûc unic intune maniere diferente”. Ai 26 di Jugn, simpri te Basiliche, l’atôr Manuel Buttus e il Piccolo Coro Artemia a puartaran in sene un spetacul dedicât al taramot dal ’76 e ai 3 di Otubar, par sierâ la stagjon, a saran memoreâts i 800 agns de muart di S. Francesc cuntun conciert spetacul de compagnie La Meridiana. In calendari ancje trê corâls di zovins, il duet Riverberi (Stefano Pellini e Pietro Tagliaferri, La Sinfonietta e la Orchestre di Cjamare di Pordenon. (A.I.) – 11.06.2026