Intal dì di S. Valantin, il Teatri Gnûf al dediche a ducj i morôs un conciert fat di romanticisim musicâl al stât pûr. Vinars ai 14 a saran di fat protagonistis tal “Giovanni da Udine” la passion, il lancûr, ma ancje la estasi e la contemplazion: dutis emozions che il compositôr plui romantic dai romantics, Pëtr Il’ič Čajkovskij, al è rivât a puartâ intes sôs oparis maraveosis. Cûr dal program al è di fat il Conciert par violin e orchestre che il compositôr rus al à scrit par un amant segret, e la sô ultime sinfonie, la Seste, intitulade “Patetiche”, che e fo sunade pe prime volte dome sîs dîs prime de sô muart. La esecuzion e je de Deutsche Kammer Philharmonie Bremen, direte di Jérémie Rhorer, cu la violiniste sudcoreane Bomsori inte part soliste. (A.I.) – 13.02.2025
Foto di Ktutai-Shim
