Al è un record che al sarà dificil di passâ, ancje se nus spiete almancul un centenâr di concierts in regjon vie pal Istât! La date “zero” di domenie di sere tal stadi “Teghil” di Lignan pe gnove tournée di Max Pezzali, “Max Forever. Gli anni d’oro”, e à tirât dongje plui di 27.500 spetatôrs e dutis lis 15 datis dal cjantant talian a son za stadis vendudis fûr par fûr, cun passe 650.000 biliets! Il spetacul al à entusiastât il public, che si è cjatât di subit intune atmosfere tipiche dai agns Nonante, daspò di une presentazion video di Amadeus (!), par passe dôs oris di musiche dal vîf e, intal mieç, un spetacul in stîl american dulà che il public al devente protagonist. Grande sodisfazion ancje pai organizadôrs – FVG Music Live e VignaPr – che, cul public rivât sabide di sere a Udin pe prime date di Eros Ramazzotti, a son rivâts a contâ passe 50 mil spetatôrs dome tal prin fin di setemane di ce che al promet di jessi un Istât cjalt! (A.I.) – 08.06.2026
Foto di F. Colombo
