Di Bach a Vasco intal Bosc Romagno

Un cuartet di arcs di formazion academiche, ma cu la vocazion par un repertori che al unìs la musiche culte ae musiche lizere di ogni timp, al è protagonist dal gnûf apontament de rassegne itinerante “Palchi nei parchi”. Vinars ai 7 al Bosc Romagno, il cuartet Quartini al contarà che tra un toc dal ‘700 e une cjançon dal ‘900 no je masse diference. In “Albachiara. Di Bach ai Beatles, di Pachelbel a Vasco” si celebre di fat l’incuintri tra i gjenars musicâi plui diviers. A vierzi la zornade, l’intervent dai esperts dal Cuarp Forestâl Regjonâl e un laboratori de pianiste Gloria Campaner. Sabide di matine, invezit, il festival si môf a Barcis, inte Foreste dal Prescudin, cul conciert “Sambei no Jazz”. (A.I.) – 06.07.2023