Dario Zampa, 80 agns di storie dal Friûl

Aromai a son agnorums che nol fâs plui un disc, ma ‘nd à vendûts passe 150 mil, plui di ducj in Friûl, massime te seconde metât dai Setante. Ai 3 di Dicembar, Dario Zampa, il plui innomenât e il prin dai cjantautôrs a doprâ la marilenghe, al fasarà otante agns, ma lis “celebrazions” a son za tacadis di un pôc, intune maniere o chê altre. Tal 2023, il regjist Dorino Minigutti i veve dedicât il documentari “Masse biel. Dario Zampa e il so Friûl”. Po dopo, il viaç inte vite dal cjantautôr di Çampis di Pagnà al è deventât chel tal Friûl dal ultin mieç secul, puartât sul palc cuntun spetacul che pe scree si clamave “O blanc o neri baste che al sedi bon”, inmaneât za tal 2024 pai 50 agns di cariere. Tal 2025, il spetacul “uficiâl” pal mieç secul di Dario e dal Friûl al è deventât “Lâ vie”, une celebrazion 50 agns daspò de publicazion dal prin disc, “Mandi vecjo Friûl”, ator pai teatris dal circuit dal Ert deventade “Crôs e croseris”. Vinars ai 27, Dario al sarà ancjemò sul palc, chel dal teatri “Ristori” di Cividât, par une gnove serade: “80 agns di Friûl 1946-2026”, cui siei musiciscj Omar Malisan, Andrea Grosso, Nicola Rapetti, la coriste Grazia Rapetti e l’ospit special Sebastiano Zorza. Une serade a jentrade libare cence sore nuie, par tacâ a fâ fieste e contâ tal stes timp la storie di une tiere che e je cambiade, ancje scoltant lis cjantadis e lis emozions pandudis di Zampa. (A.I.) – 26.03.2026