Di cuasi 25 agns, la associazion culturâl Maravee e met dongje progjets sul teritori: il circ, la danze e il teatri cun “Maravee Circus”, il studi dal passât te sezion etnografiche “Aes lidrîs dal cuotidian”, i lavôrs cu la Scuele mosaiciscj di Spilimberc par CREAttivo e vie indevant. Sot dal non “Maravee Projects”, la associazion fondade de critiche de art Sabrina Zannier e è prontât pal 2026 un calendari siôr di events, di joibe ai 2 di Lui e fint al mês di Dicembar, ator pai parcs di cuatri cjistiei e un pâr di areis archeologjichis. Cun 14events, 10 produzions origjinâls, 4 video, un curtmetraç e passe 50 artiscj, tecnics e professioniscj tirâts dentri, Maravee e je une racuelte di events jenfri nature, architeture e archeologjie, che dal 2002 a son rivâts in 34 comuns de regjon e in 52 lûcs diferents. Chest an si tache cul festival “Maravee Circus”: un spetacul ogni joibe dal mês di Lui, daspò dai laboratoris di Claudia Contin Arlecchino e Domenico Lannutti, tai cjistiei di Susans, Glemone, Colorêt e Forgjarie. Il titul dal spetacul al è “Domatori dell’incertezza” e al conte une vite – che e je ancje la nestre – jenfri flabe e realtât. Di Setembar a tornin i spetacui di CREAttivo te Domus di Tito Macro te Aquilee romane, par cirî di capî cemût che i antîcs a tratavin i refudons. E po dopo, il circ e il ricicli si metin adun par contâ i mîts e il mont tal gnûf spetacul “Ri/Circus”, dal mês di Novembar tal Teatri di Glemone. (A.I.) – 30.06.2026
Foto di R. Patat
