Cun “Blanc” si sune in lûcs stramps

Dîs events in nûf comuns pe gnove edizion dal Blanc European Festival, che si davuelç ancje in lûcs insolits (la mont, lis latariis storichis…) e al ospite artiscj di innomine ancje internazionâl: par esempli, Giovanni Allevi. La rassegne metude adun dal violoncelist e diretôr artistic Riccardo Pes, che e vûl tornâ a scuvierzi il sens di comunitât disvilupant il teme dal rapuart jenfri om e nature. La prime serade e conferme il spazi dât ai zovins furlans di talent: vinars ai 25 a Cjastelgnûf, la cjantautore Nicole Coceancig e presente in conciert il so gnûf album “Zohra”: Il dì dopo a Cjevulis, e torne la Blanc Orchestra, nassude propri dentri de rassegne. (A.I.) – 24.07.2025