O sin pardabon libars di movisi di là des scjaipulis dai nestris pinsîrs, des tradizions, di normis acuisidis, prime ancjemò di chês scritis? Cun cheste e altris domandis e tache la esplorazion dal teme “Tabù”, al centri de trentesime cuarte edizion dal Mittelfest – il festival di teatri, musiche, danze e circ de aree Centrieuropeane e balcaniche, cun sede a Cividât. Leant lengaçs, gjenars e stîi diviers, il Mittelfest al cirarà, si che duncje, di esplorâ i confins, dispès scuindûts e altris voltis sorpassâts, dai “tabù”, presentant une trentine di spetacui sielts dal diretôr artistic, Giacomo Pedini. Il festival, che si tignarà dai 18 ai 27 di Lui, al rivarà dopo dal “Mittelyoung”, la rassegne dal teatri european zovin, in program dai 15 ai 18 di Mai. Doi avigniments che a fasaran deventâ Cividât “fulcri internazionâl de culture in F-Vj”, doprant lis peraulis dal sindic, Daniela Bernardi, creant cussì chês “sinergjiis virtuosis par promovi il teritori traviers la culture” nomenadis dal assessôr ae Culture de Regjon, Mario Anzil dilunc de presentazion dal festival. (A.I.) – 17.04.2025
Foto di L. d’Agostino
