Cuatri pianos e 16 sunadôrs

Trentedôs mans su cuatri pianos par sedis pianiscj che a sunin ducj adun: si vierç cussì, cuntun conciert che al lassarà par sigûr il segn, la otave edizion dal festival “Piano City Pordenone”, vinars ai 19 te place della Motta, dentri di TU27, il teatri urban screât in spiete de capitâl nazionâl de culture 2027. Un progjet che al à mudât la place intun palc di un teatri tal viert, là che la musiche si messede ancje cu la multimedialitât. In graciis de regjie di Federico Cautero, lis proiezions fatis sui palaçs ator de place a fasaran deventâ la architeture une part dal spetacul. Il program musicâl curât di Pasquale Iannone e Teresa Trevisan cun Gregorio Goffredo al travierse i secui intun viaç e al sarà une sorprese, di Tchaikovsky a Perez Prado, di Ravel a Gershwin, Rachmaninov e cetancj altris. Il progjet al è nassût de colaborazion dai doi pianiscj cun atris 16 musiciscj che a rivin dai Conservatoris di Bari e Triest. Il “Piano City Pordenone”, nassût a Berlin di une idee dal todesc Andreas Kern tal 2010 e po dopo puartât ator pe Europe e in Italie, al sarà come simpri une maratone di musiche che e dure par trê dîs, fint a domenie ai 21, cun passe cent concierts curâts di Bruno Cesselli, Lucia Grizzo e Antonella Silvestrini: mai cussì tancj. (A.I.) – 18.06.2026