Cuant che la musiche e à fat colâ il Mûr

La musiche e je protagoniste dal cuart apontament di “Aspettando Pordenone Docs Fest”, joibe ai 15 a Cinemazero, cul cine tant spietât “Kissing Gorbaciov”. Il documentari al fâs rivivi un avigniment storic e un dai episodis plui improbabii de storie de musiche taliane. Intal 1988 a Melpignano, in provincie di Lecce, la Zonte comuniste e poie la realizazion di un festival che al à l’obietîf di ospitâ in Italie artiscj sovietics e altris talians, par dopo lâ ducj a sunâ in Russie. Il scambi al sucêt, i grups si cjatin, ma la Union Sovietiche e scomence a sfreolâsi sot dai voi dai protagoniscj di chel viaç, fintremai che il Mûr al cole. Tra chescj, ancje i CCCP, cuatri punk emilians filosovietics. (A.I.) – 14.02.2024