Une storie vere, vivude intune lungje gnot de umanitât dulà che il scûr al someave che aromai al ves vinçût, e dulà che a cualchidun nol restave che di lotâ in maniere valorose par che in cualchi maniere la lûs e tornàs al mont. I zovins che Alex Cendron al à decidût di contâ in “Aquile randagie – credere disobbedire resistere” (Acuilis vagabondis – crodi disubidî resisti). A vevin i bregons curts e un façolet al cuel: i boy scout che daspò dai 9 di Avrîl dal 1928, cuant che Mussolini al veve declarât la sopression totâl dai scout in Italie, a Milan a àn decidût di disubidî a une leç no juste cuntun lunc periodi di ativitât clandestine. Une vere resistence di zovins che e je lade indevant par 17 agns, e che joibe ai 25 e sarà presentade intal spetacul in program tal Teatri di Monfalcon. (A.I.) – 24.01.2024
Foto di L. Pozzo
