Cristicchi al torne a Glemone cul “Orcolat”

da Andrea Ioime

Dîs agns daspò di vê debutât, il spetacul “Orcolat ’76” di e cun Simone Cristicchi, produsût di Edit pal Ert e il Comun di Glemone cu la poie de Regjon F-Vj, al torne tal Domo di Glemone martars ai 15 cuntune dople repliche: une pes istituzions tal dopomisdì e une pal public sot sere. Metût adun dal cjantautôr e atôr roman dîs agns indaûr, “Orcolat ’76”, scrit cun Simona Orlando e cu lis musichis origjinâls di Valter Sivilotti, al viôt sul palc il stes Cristicchi, la FVG Orchestra e la Corâl dal F-Vj diretis di Sivilotti, cu lis vôs di Anna Maria De Monte e Francesca Gallo e cualchi toc storic de cjançon furlane, di Giorgio Ferigo a Dario e Ennio Zampa. Cincuante agns daspò dal taramot di Mai e di Setembar, il spetacul al torne a tirâ fûr lis memoriis e lis feridis ancjemò viertis, contant la tragjedie, ma ancje il miracul clamât ricostruzion e “model Friûl”. La opare, che e à vût un prolic internazionâl vie pe Vierte a Toronto e a Washington, e rapresente “une celebrazion di une feride, di un dûl – al à sclarît Cristicchi – ma e je ancje un esempli e une storie di resuriment. Un esempli par ducj in Italie e ator pal Mont”. (A.I.) – 14.09.2026

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Progjet finanziât de ARLeF
Agjenzie Regjonâl pe Lenghe Furlane

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui