Concierts sul cricâ dal dì pal principi dal Istât

Ai 21 di Jugn si celebre il Solstizi di Istât, che al ven celebrât aromai in dut il mont al nassi dal soreli. Cheste date e à un valôr particolâr intune localitât tant che Grau, dulà che, ancje chest an, il soreli che al ven sù al vignarà saludât di un conciert al cricâ dal dì, su la Rive “Nazario Sauro” ae altece dal palaç dal Comun. La orchestre di arcs “I solisti di Venezia” e proponarà un conciert cun musichis cjoltis dal grant repertori talian. A anticipâ il conciert, une Messe al viert aes 5 di matine. Il solstizi di Istât e la Fieste de Musiche si celebrin ancje a Aquilee, inte aree archeologjiche dal puart fluviâl antîc, cul conciert dal duet formât dal flautist Tommaso Dionis e de violonceliste Francesca Favit. (A.I.) – 20.06.2023