Conciert pe fieste de Republiche

In ocasion dal otantesim aniversari de Republiche taliane, Palme e je pronte a ospitâ une serade di memorie, musiche e riflession. Martars ai 2 di Jugn, aes 8 e mieze sot sere, te ex Caserme “Piave” al sarà presentât il conciert par corâl e naratôrs dal titul lunc “Geme in noi nascosta una ferita e le dà voce il vento della pianura”, inmaneât dal Comitât Provinciâl dal ANPI di Udin e dal Comun di Palme. Il conciert al è part di un progjet sostignût de Regjon pe rigjenerazion culturâl e sociâl dai lûcs segnâts de memorie storiche. Il teme di fonde dal event al sarà il concet di “consolazion” tant che pratiche civiche e culturâl. La serade si davuelzarà intun lûc simbolic de repression naziste dai partigjans inte Basse furlane: jenfri la Sierade dal 1944 e la fin dal 1945, la Caserme “Piave” si mudà intun lûc di torture e preson, e ancjemò al dì di vuê e puarte i ricuarts di dut chel dûl. La coral Polifoniche di Rude, direte di Fabiana Noro, e cjatarà in chest ambient, cui naratôrs Rossana Di Tommaso e Alberto Prelli e l’acompagnament musicâl di Ferdinando Mussutto, Chiara Trentin e Gabriele Rampogna. (A.I.) – 31.05.2026