Conciert di no podê dismenteâ te abazie di Siest

Cjape un lûc plen di storie e bielece, ven a stâi la abazie di Sante Marie in Silvis a Siest, lis contis valentis dal abât bonsignôr Giancarlo Stivel, che al à disvelât il passât e la iconografie des pituris a fresc restauradis che nol è tant e che a insiorin parêts, arcs e presbiteri. Daspò fâs sù dut cu lis notis dal orghin sunât di un talent grant come Gabriele Agrimonti, organist de glesie di San Luigi dei Francesi di Rome, e tu varâs une serade che no si pues dismenteâ par trope bielece e armonie che e sedi stade buine di trasmeti al public che al à jemplade la glesie, che un timp e jere risiervade dome ai munics benedetins.
Nol podeve sierâsi miôr di cussì la seste edizion dal Festival Organistico Sestense, curât dai doi zovins e visionaris diretôrs artistics Alberto Gaspardo e Marco Baradello e judât cun convinzion de aministrazion comunâl di Siest – rapresentade pe ocasion dal assessôr ae Culture a al Turisim Elisa Coassin – che i va ricognossût il merit di vê capît trop che al sedi preziôs un scrign plen di storie e culture come che e je la abazie di Sante Marie in Silvis e che, fin dal principi, e à crodût in cheste iniziative.
Lis cinc improvisazions sunadis di Agrimonti – ancje in graciis des ripresis video ben fatis dai fradis Trevisanut, proietadis suntun grant schermi juste sot dal altâr – che a àn permetût di cjalâ la sô maestrie, il movisi frenetic di dut il so cuarp par componi un spartît origjinâl e che no si pues ripeti, un fat se no risiervât a pôcs par vie de posizion un pôc platade dal grant orghin restaurât – a àn jemplât di melodie il templi, tant di fâ deventâ chest apontament emozionant e bon di regalâ ai presints une esperience di intensitât rare.
Al veve fat ben il mestri organist Gaspardo a visânus che, cundut de sô posizion defilade, lis vibrazions flautadis e sonoris dal orghin a varessin jemplât ducj i cjantons de abazie, parcè che “i nestris progjenitôrs a savevin ben cemût fâ lis robis”. Al veve reson, ma ae fin di une serade tant biele, ancje nô o podìn consolâsi, parcè che ancje tai dîs nestris e je int che lis robis e sa fâlis pardabon ben, une vore ben. (a.d.g.) – 27.04.2026