Comedie intun tinel borghês american

Stâts Unîts, fin dal Votcent, un tinel borghês: al è l’ambient là che si movin lis protagonistis – dôs damis e une camarele – di “Boston Marriage”, la comedie firmade dal premi Pulitzer David Mamet, in sene tal Teatri “Giovanni da Udine” joibe ai 27 pe rassegne “Soggetto donna” (Sogjet feminin). Il spetacul al viôt sul palc trê atoris di nivel assolût, Maria Paiato, Mariangela Granelli e Ludovica D’Auria, diretis di Giorgio Sangati, e al sarà precedût  di un incuintri di aprofondiment dal titul “Conflit e riconciliazion” par cure dal professôr Peter Brown, diretôr de British School dal F-Vj. (A.I.) – 26.02.2025

Foto di S. Pea