Cineteche di Glemone: in rêt 1.000 minûts ator dal taramot

Intal cincuantesim aniversari dal taramot, la Cineteca del Friuli, fondade tal Fevrâr dal 1977, pôcs mês daspò dal disastri, e à sielzût la date simboliche dal 6 di Mai par presentâsi al public e ai utents cuntun sît in rêt dut ristruturât, progjetât dal studi Quadrato di Udin. Un progjet che al è stât pensât par fâ in mût che il patrimoni cinematografic al sedi simpri plui acessibil e condividût. La plui grande inovazion, che e sclarìs la sielte di cheste date, e je une sezion dedicade al acès diret a une part dal patrimoni cinematografic de Cineteche. In struc: visitant www.cinetecadelfriuli.org, si pues consultâ in mût libar passe mil minûts di imagjins che a contin la storie dal Friûl prin dal taramot, i moments tragjics de emergjence e chei de ricostruzion. Dopo tancj mês di lavôr, il laboratori di Archivio Cinema al à completât la digjitalizazion des imagjins, sedi professionâls sedi amatoriâls, cjapadis sù vie par passe cincuante agns di storie: la grande colezion de Cineteche sul taramot dal 1976. Doi musiciscj a son stâts cjapâts dentri te publicazion in rêt: l’artist sonôr Ranter’s Bay e Marco Brosolo di Pordenon, che al è a stâ a Berlin di agnorums, e che al à vût di pandi la profonditât emotive dal sunôr ai materiâi muts. (A.I.) – 05.05.2026