Cine orientâl: a Udin dut pront par tornâ capitâl

La vincjesime otave edizion dal “Far East Film Festival”; che si fasarà dai 24 di Avrîl e fint ai 2 di Mai tal Teatri gnûf “Giovanni da Udine” e tal cine “Visionario”, e previôt proiezions di buinore fin tart, cetantis stelis che a rivin di lontan sul “tapêt ros” udinês, spazis didatics, culturai e comerciâi e ducj chei altris events – almancul un centenâr! – che a mudaran il cûr de citât intune “Asian Zone”, une zone asiatiche, plene di colôrs. I numars presentâts li dal Visionario dai organizadôrs a son propit chei di une rassegne di nivel mondiâl: 76 titui, 52 di chei in concors, di 12 Paîs diferents, cun vot primis visions mondiâi, 18 anteprimis internazionâls, 22 europeanis e 20 talianis. Une selezion penze di cine popolâr, ma ancje cun cualchi omaç al passât e aes produzions “di autôr”. Lis stelis plui grandis che a rivaran a Udin par cjapâ il “Gelso d’oro”, Il Morâr di aur ae cariere, a son la cinese Fan Bingbing, pe prime volte achì passe vincj agns indaûr, e il gjaponês Yakusho Koji, cui siei 40 agns di cariere. Pal dì de scree, i titui a son “We Are All Strangers” di Anthony Chen, dret di Singapûr. (A.I.) – 07.04.2026