Cheste volte Cristicchi al conte Triest tal 1954

Un event speciâl fûr di abonament par vierzi il program dal teatri “Verdi” di Pordenon, che ancje chest an al rinfuarç il so impeagn par une ufierte culturâl largje e trasversâl, cun esclusivis e spetacui in prime. Chel di martars ai 14, za dut plen, al è “Trieste 1954”, la gnove produzion dal Teatri Stabil dal Friûl-Vignesie Julie, di e cun Simone Cristicchi, scrit cun Simona Orlando e diret di Paolo Valerio, cu la direzion, i rangjaments e lis musichis origjinâls. Sul palc ancje la vôs di Franca Drioli, la Orchestre de Academie Musicâl “Naonis” di Pordenon e la Coral dal F-Vj, par un spetacul che al è un omaç ae citât di Triest e ai setante agns di cuant che e je tornade in Italie. Un viaç poetic e civîl che al torne a dâ vôs e memorie a une pagjine complicade e dispès dismenteade de storie dal Nûfcent: i nûf agns prime de “liberazion”. (A.I.) – 13.10.2025