Carniarmonie: cuarante concierts in doi mês

Inmaneât come simpri de fondazion “Luigi Bon” di Culugne cu la direzion artistiche di Claudio Mansutti, “Carniarmonie”, il festival che al met in rêt Cjargne, Valcjanâl e Cjanâl dal Fier, colaborant cu lis miôr realtâts culturâls de regjon e in sinergjie cun chês de Italie e dal forest, al ufrìs cuarante concierts in vincjesiet comuns dai 12 di Lui ai 15 di Setembar. Aromai une manifestazion musicâl storiche, une esaltazion di storie di chenti, une valorizazion dai patrimonis architetonics e de nature, il festival rivât ae trentesime tierce edizion al ufrìs musiche par ducj i guscj: de classiche ae contemporanie, cun soliscj, corâls, grups e orchestris, oparete, jazz e musichis di dut il mont in formazions svariadis. Si tacarà vinars ai 12 tal teatri “Luigi Candoni” di Tumieç cu la Fvg Orchestra direte di Florian Krumpöck, arlêf di Daniel Barenboim, e la pianiste Elisso Bolkvadze de Gjeorgjie. Il dì dopo a Dimpeç, la presentazion dal disc “Barlums. Canti d’inchiostro” de formazion furlane di musiche folk Braul. Po dopo, il miôr dal pop american cun The Palm Court Quartet (ai 18 di Lui a Paulâr), la arpiste Emanuela Battigelli e la pianiste Luisa Valeria Carpignano ai 20 e po dopo cetancj altris artiscj e artistis. (A.I.) – 10.07.2024