Capitâl de fantasience di 25 agns

Di martars ai 28 e fint ai 2 di Novembar, la nestre regjon e torne capitâl dal grant cine di fantasience, cu la vincjesime cuinte edizion dal “Trieste Science+Fiction Festival,” inmaneât a Triest dal centri ricercjis e sperimentazions La Cappella Underground. Sul grant schermi dal teatri “Rossetti” e dal “Miela” si viodaran passe 50 anteprimis talianis e mondiâls: lis peliculis in concors (pal premi “Asteroide”, i doi “Méliès d’argent” e altris ricognossiments), i curts, i documentaris, i classics inte version restaurade, i cines di miezegnot e une propueste di lavôrs plui sperimentâi. Cun di plui, al è un calendari plen di apontaments di leterature, videozûcs, gnovis tecnologjiis, conferencis, mostris e ospits innomenâts che il diretôr artistic Alan Jones al à metût adun par un public afezionât, ma ancje par professioniscj dal cine e une sezion, “Artificial Universe”, di curtmetraçs fats propit cu la inteligjence artificiâl. (A.I.) – 27.10.2025