Anzovino al sierarà il tour nazionâl “in cjase”

Remo Anzovino al sierarà il so “Atelier Tour” cuntun conciert di no podê pierdi tal Teatri “Verdi” di Pordenon, la sô citât, ai 4 di Jugn. L’avigniment al rapresente la tape finâl di un tour che al à cjapât la vie ai 15 di Març a Turin e che al celebre i vincj agns di cariere dal compositôr e pianist pordenonês. I biliets pal conciert a son disponibii in prevendite tacant di joibe ai 10 sui sîts uficiâi Ticketone.it e Eilo.it. L’anunzi dal conciert al è rivât propit dal palc dal “Verdi”, dilunc de serade di fieste pe designazion di Pordenon a Capitâl taliane de culture 2027. Un moment simbolic che al à unît in maniere ideâl il percors artistic di Anzovino cun chel de sô citât. (A.I.) – 10.04.2025