Anteprime pe fieste di Spilimberc

A Spilimberc dut al è in vore par ospitâ la diesime seconde edizion dal festival “Le giornate della luce”,ideât di Gloria De Antoni e diret cun Donato Guerra, programât dai 6 ai 14 di Jugn. Une anteprime dal festival e sarà martars ai 26 aes dîs e mieze di buinore tal cine “Miotto” di Spilimberc, cuntun event speciâl organizât in colaborazion cul CICP, Centri Iniziativis Culturâls di Pordenon. L’event si concentrarà sul documentari “Catartis – Conservare il futuro” di Ferdinando Vicentini Orgnani, cu la fotografie di Renato Favro, produsût tal 2025. Midiant des esperiencis di prime man e des testemoneancis di figuris clâf su la sene artistiche internazionâl – par esempli Joseph Kosuth, Michelangelo Pistoletto e Jannis Kounellis, e dongje di lôr lis vôs di Gianna Nannini e Patti Smith – il regjist furlan al à metût dongje un viaç, detaiât e imersîf, daûr des senis dal mont de art contemporanie. La storie si disvilupe tant che un viaç di esplorazion che al instrece riflessions, visions e pratichis creativis. (A.I.) – 25.05.2025