Anime in vore: al torne il progjet de cjançon di autôr

Sot dal tendon dal parc des ex scuelis elementârs di Cjampfuarmit, domenie ai 15 al torne “Anime in vore”, un progjet di musiche e peraulis inmaneât de associazion “Musicisti Tre Venezie” di Rocco Burtone. Nassût tal 2009 cul non “Soul lab”, al jere un progjet dedicât ae cjançon di autôr, che al tirave dentri zovins e zovinis che a presentavin tai teatris de regjon il spetacul che a vevin scrit in doi mês di laboratori creatîf. Une di chês vôs e jere Gianna Saccomano, che no je plui e che e sarà ricuardade propit cun cheste gnove edizion di “Anime in vore”, un spetacul cence retoriche cuntune schirie di partecipants: Mariano Bulligan, Giulia Oblach, Nicolas Rosan, Michela Franceschina, Elisa Metus, il grup Vividule Project, Marina Ferro, Dania Lascialfari, Fabrizio Ursella , Daniele Ursella , Iacopo Novello… (A.I.) – 13.06.2025