Ancje in Dvd e Blu Ray il cine dedicât a Marcho

Dopo dal sucès televisîf a nivel talian su Rai Storia e di public, in ocasion des proiezions tai cines dal Friûl, “Marcho. L’ultima bandiera”al devente ancje un satûl preziôs. Il docu cine coprodusût de ARLeF e di Arte Video srl, cul contribût de Friuli Venezia Giulia Film Commission e dal Fonts pal audiovisîf dal Friûl-Vignesie Julie, al sarà a disposizion tai formâts DVD, Blu Ray e Ultra HD Blu Ray. Dentri dal satûl no saran dome i trê supuarts digjitâi cu la version interie dal documentari (par furlan, talian e, volint, cui sottitui par inglês), ma ancje contignûts une vore interessants: fotografiis di backstage, il trailer dal cine e ancje intervistis a Marco Fabbro (regjist), a Eros Cisilino e William Cisilino (president e diretôr de ARLeF), ai atôrs Paolo Mutti (Marc di Murùs) e Aida Talliente (Catarine Arcoloniane, la sô femine) e a Vincenzo Di Francesco (compositôr des musichis origjinâls che a compagnin lis senis). In zonte ancje un librut trilengâl (par furlan, talian e inglês), curât di William Cisilino, che al contestualize in maniere precise dal pont di viste storic la vicende di Marc di Murùs: ultin puartebandiere dal Stât patriarcjâl di Aquilee e figure emblematiche de resistence ae vuere declarade al Friûl de Serenissime Republiche di Vignesie tor il 1420. (A.I.) – 05.06.2025