Al va indevant di 54 agns e al è stât la “palestre” e une farie par cetancj regjiscj, atôrs e atoris furlans, deventant vie pal timp un dai apontaments plui impuartants no dome de citât, dongje di jessi une des manifestazions di teatri zovin plui vecjis de Italie. Il Pali Teatrâl Studentesc “Citât di Udin”, inmaneât di simpri dal Teatro Club Udine, al tache ai 24 di Avrîl cuntune edizion siore di novitâts, ospits e colaborazions, fint ai 22 di Mai. Il diretôr artistic Paolo Mattotti al à metût adun un program cun passe trente spetacui, che al è za tacât cuntune cerce “in cinc minûts” di dutis lis propuestis fatis dai grups di students di Udin (Bearzi, Stellini, Zanon, Marinoni, Copernico, Marinelli, Malignani, Uccellis, Deganutti, Sello, Percoto) e provincie (lis scuelis di Codroip, S. Denêl, Tarvis, Tumieç, Cividât, Glemone) e ancje di Spilimberc e Gurize. Si tache ai 24 di Avrîl cui ospits de scuele ”Vallauri” di Velletri, citât zimulade cun Udin, al torne ancje Klaus Martini, vuê preseât atôr e regjist, che al è tacât propit al “Pali” prime di fâ la academie e che al presentarà “P.P.P. Ti presento l’Albania”. (A.I.) – 23.04.2025
Foto di B. Folena
