Il teatri che si môf par metisi in dialic cu lis istituzions, traviersâ il teritori, cjatâ lis personis e tal ultin meti dut chest in relazion, mudant ogni spetacul intune scuvierte gnove. Al è il centri di “Festil”, il festival dal Istât, che chest al larà indevant dai 2 di Lui fint ai 26 di Setembar cun 20 propuestis diferentis e 20 titui in program a Udin, Gardiscje, Duìn e Triest. Diret di Tommaso Tuzzoli e Federico Bellini e inmaneât di Tinaos in sinergjie cul CSS, Teatri stabil di inovazion dal F-Vj, al è un voli viert par cjalâ miôr la dramaturgjie contemporanie in cheste bande dal continent, “de Istrie al Friûl”. Un progjet che al larà indevant fint a Dicembar cu la cuinte edizion dal progjet teatrâl “Futuro Passato”, une farie di atôrs zovins di talent dal teritori. I organizadôrs di “Festil” a cjalin simpri cun rivuart lis gnovis realtâts dal teatri, massime dal teritori, che al va di cheste fint ae altre bande dal confin par vocazion. La volontât e je chê di lei il dì di vuê midiant il teatri emergjent, creant un puint jenfri teritori e comunitâts. Il prin spetacul a Udin joibe ai 2 tal teatri “San Giorgio” al è “Officina Prometeo” di e cun Francesco Picciotti, po dopo e rivarà Cinzia Spanò cun “Esagerate! Più che un aggettivo un’esortazione”, “Mr Ping Pong” di e cun Paolo Piludu e dut il rest dal program. (A.I.) – 01.07.2026
Foto di E. Consoli
