Al “Mittelfest” la version furlane di une comedie di Yasmina Reza

Prime assolude dal spetacul “Maçalizi” al Mittelfest di Cividât, vinars ai 29 di Lui, aes 19 e aes 21.30, e po dopo di gnûf ai 30 di Lui tai stes oraris, inte suaze dal Claustri di Sant Francesc (in câs di brut timp, inte glesie di Sant Francesc). Fabiano Fantini, Massimo Somaglino, Aida Talliente e Rita Maffei – che e je ancje regjiste – adun cun Fabrizio Arcuri a son i protagoniscj dal spetacul, gjavât fûr de comedie de dramaturghe Yasmina Reza, deventade famose intal 2011 cul film “Carnage” di Roman Polanski (par talian “Il dio del massacro”), che al conte di un confront/scuintri tra dôs fameis intun contest borghês.“Le Dieu du carnage” (chest il titul origjinâl) al devente “Maçalizi”, cu la traduzion par furlan di William Cisilino e Michele Calligaris. Il spetacul al è il risultât de colaborazion di Mittelfest cun la Agjenzie regjonâl pe lenghe furlane (Arlef) e cul Css – Teatro stabile di innovazione. (A.I.) – 28.07.2022