Aiar di Carnevâl cul tercet di Viene

Il Carnevâl al è intal aiar e i Amîs de Musiche di Udin a proponin un conciert che al anticipe lis atmosferis dai dîs vienês plui colorâts dal an. Il cartelon 2023-24 de centesime seconde stagjon e va indevant al Teatri Palamostre miercus ai 31 di Zenâr, tacant come simpri aes 19.22 in ricuart dal an di fondazion, il 1922, e ospitant ancjemò une volte i trê fradis dal Jess Trio Wien. A vevin debutât propit chi intal 1988, intune serade che ur à viert lis puartis a une cariere internazionâl fortunade. A distance di 36 agns, a mantegnin il lôr leam cul Friûl e a rivin di Viene cuntune sorprese: il zovin David Kropfitsch, violinist de “gnove gjenerazion” de famee. (A.I.) – 30.01.2024