Ae ricercje di talents furlans pal teatri e la television

Di cualchi dì e fint al Prin di Jugn, al è pussibil candidâsi par jentrâ a Se Tu Sês Bon”, il prin “talent show” furlan, ideât e vuidât di Matteo Trogu, president e diretôr artistic, dut inmaneât de organizazion di volontariis cul stes non de iniziative. Che e e je nassude tal principi dentri di une parochie, cuntun piçul grup di zovins che vie pai agns al è cressût simpri di plui, passant dai piçui ambients ai teatris plui impuartants de regjon. Daspò di dîs agns a supuart di une realtât dal teritori impegnade te cure e riabilitazion di fruts malâts di tumôr, dal an passât il grup di organizadôrs – deventât une associazion di cuasi vincj zovins che a curin dutis lis fasis dal spetacul – al à decidût di destinâ ducj i bêçs vuadagnâts ae cooperative sociâl Hattiva Lab, che di agnorums e je impegnade a fâ progjets par disabii. Lis semifinâls e la serade finâl di “Se Tu Sês Bon” si podaran viodi di chest an su Telefriuli, in direte dai gnûfs studis di Felet. Cui che al vûl provâ a jentrâ tal spetacul al à dome di là in rêt (www.setusesbon.it) e cjamâ un video di pôcs minûts pes selezions, mostrant il propri talent intune forme di spetacul tradizionâl o mancul, dal cjant al balet, dai trucs di magjie ae comicitât. Trente i puescj che a saran selezionâts. (A.I.) – 19.04.2026