A Vençon si zire une misteriose serie pe television

Lis ripresis a son tacadis lunis ai 19 a Vençon e in altris citâts dal Friûl-Vignesie Julie par “Memoriæ”, la gnove serie di Rai Fiction produsude cul supuart de Fvg Film Commission – PromoTurismo, direte di Cosimo Alemà e Isabella Aguilar. Ambientât su pes monts, “Memoriæ” al scomence cuntun event catastrofic: daspò di un slac di tiere, i abitants di Vallata (il borc di Vençon) si cjatin cence sîs agns di ricuarts. Intant che une cuarantene rigorose ju separe dal rest dal Mont, un foto gjornalist cence pôre e une dotore cuntun passât tormentât a cirin di capî se il disastri al à sgjavât alc sepulît in profonditât inte tiere o se al jere dome tal lôr cjâf. Lis ripresis a laran indevant fint ai 28 di Març e la serie si viodarà su Rai Play. (A.I.) – 20.01.2026