A “Udin&jazz” al è il moment de stele plui grande

Al è l’ospit plui innomenât internazionâl: une liende dal jazz, in ativitât di passe sessante agns. Il pianist Herbie Hancock al è il protagonist de cuinte zornade di “Udin&Jazz”, che e va indevant fint a domenie ai 20. Tal Plaçâl dal Cjistiel, daspò di une altre stele che e à jemplât ducj i opuescj, Jacob Collier, l’artist american – cognossût di ducj pe sô ande visionarie al strument e te composizion de musiche – al rive cuntune formazion straordenarie – Terence Blanchard ae trombe, James Genus al bas, Lionel Loueke ae ghitare e il zovin baterist Jaylen Petinaud – par presentâ il miôr de sô musiche: de colaborazion storiche cun Miles Davis tai agns ’60 ai esperiments eletrics dai ’70, fint aes esplorazions dai ’80 e vie indevant. A vierzi la lungje serade. As 6.30 di dopomisdì te cort Morpurgo, un incuintri cun Stefano Zenni, un dal plui grancj esperts di jazz talian, che al presente il so ultin libri. Po dopo, la prime jessude in public de Jazz Big Band formade dai talents zovins dal conservatori “Jacopo Tomadini” di Udin. (A.I.) – 15.07.2025