A Udin, i zovins talents de danze sul palc

Domenie ai 23, al Teatri S. Zorç di Udin, al torne des 6 dal dopomisdì, “WhatWeAre”, une plateforme di danze contemporanie par autôrs e interpretis, promovude de Adeb, Associazion di danze e balet, in colaborazion cul Comun di Udin, il CSS e Danza&Danza. La iniziative, inmaneade di Elisabetta Ceron e direte dal pordenonês Massimo Gerardi, e je nassude par dâ visibilitât ae ricercje di coreografs e danzadôrs che a son daûr a cressi in chest setôr. Ancje in cheste otave edizion, i artiscj zovins a presentaran lis propriis coreografiis a une comission, direte de danzadore e coreografe Nastja Bremec e componude di diretôrs e/o rapresentants di istituzions variis. (A.I.) – 21.04.2023

Foto Raccanello