44
La rassegne teatrâl “Innesti”, ideade di ArtistiAssociati, centri di produzion teatrâl e proponude te sale Bergamas di Gardiscje, e tache di miercus ai 29 e fint a vinars ai 31 cu la leture teatrâl “PP – Pasolini Privato”, di e cun Cristian Gianmarini. Une rileture de vite dal inteletuâl e di ce che al à scrit, contant soredut i agns di frut, chei in Friûl, la sô formazion poetiche e umane, il rapuart cul pari Carlo Alberto, la mari Susanna e il fradi Guido: trê figuris straordenaris, complicadis, animadis di randis passions, cuntune lûs e ancje ombrenis cussì violentis di tirâ dentri e comovi cui che al sui svicine. La conte e je fate cu la leture dai tocs plui corâts che Pasolini al à dedicât ae sô famee. (A.I.) – 28.10.2025
